Албанскиот премиер Еди Рама во интервју за Ројтерс вчера изјави дека неговата земја ќе продолжи со реализацијата на луксузното одморалиште планирано на оддалечен дел на албанскиот брег од страна на зетот на американскиот претседател Доналд Трамп Џаред Кушнер и неговата ќерка Иванка Трамп, и покрај протестите поради влијанието врз животната средина.
Протестите беа наречени Фламинго револуција, бидејќи тој дел од брегот е станица на миграцискиот пат за овие птици. Тие прераснаа во пошироко спротивставување на одредени аспекти од тринаесетгодишното владеење на Рама.
ЕУ, која има 27 членки, порача дека може да прими нови членки, вклучувајќи ја Црна Гора, Албанија и Украина, до 2030 година, но дека тоа зависи од усогласеноста со законите на ЕУ, вклучително и оние поврзани со животната средина.
„Албанија треба да се воздржи од потези што би можеле да го загрозат исполнувањето на конечниот критериум и очекуваме албанските власти да дејствуваат без одложување“, изјави портпаролот Гијом Мерсие.
„Во контакт сме со албанските власти во врска со ова прашање“, додаде тој.
Соочен со протестите во текот на изминатата недела во Тирана и на јужниот брег, каде што се предлага да се гради одморалиштето, Рама ги намали еколошките загрижености и кажа дека ќе биде завршена проценка на влијанието врз животната средина.
„Многу сме горди на она што го направивме за дивиот свет во Албанија. Европската комисија нема причина да се сомнева во нашата силна волја да заштитиме сè што мора да се заштити кога станува збор за дивиот свет и природата“, кажа тој.
Афинити партнерс на Џаред Кушнер, компанијата која треба да го изгради одморалиштето, не одговорила на барањата на Ројтерс за коментар.
