Шведска е подготвена да се приклучи на НАТО, веројатно во рок од неколку дена, откако минатата недела ја доби конечната и клучна потврда од другите членки.
Вежбите, во кои учествуваат повеќе од 20.000 војници од повеќе од десетина земји, се одржуваат на далечниот север, чија слика е значително променета со пристапувањето на Шведска и Финска во Алијансата, кои го свртеа грбот на долгата историја на неврзаност по рускиот напад на Украина пред две години.
Во Боде, северна Норвешка, американските и норвешките авиони Ф-35 им се придружија на финските Ф-18 и шведските борбени авиони Грипен во прелетувањето над воената база Камп Бодин, како дел од првиот тест на заедничкиот центар на нордиски воздушни операции, клучен дел од воената вежба.
„Новина е дека се обидуваме да се интегрираме уште повеќе, што е овозможено со неодамнешното членство на Финска и претстојното членство на Шведска во НАТО“, рече генерал-мајор Ролф Фоланд, командант на норвешките воздухопловни сили и шеф на новиот центар.
„Тогаш ќе биде отстранета и последната пречка за целосна интеграција, што ќе ни овозможи да работиме како единствени воздушни сили, во мир, криза и војна“.
Повеќе од 300 офицери и специјалисти работат на координација и контрола на авионите кои учествуваат во вежбите, од кои околу половина привремено оперираат од кампот Бодин.
Вежбите на крајниот север на Норвешка, Шведска и Финска се дел од сеопфатните сојузнички вежби Стедфаст дефендер 2024.
Се очекува околу 90.000 војници да се приклучат на пошироките вежби на НАТО, кои ќе траат до мај и кои вклучуваат повеќе од 50 бродови, како и авиони, тенкови и други оклопни возила.
Шведска, Норвешка, Финска и Данска минатата година се согласија да започнат со создавање единствена нордиска воздушна одбрана за да се спротивстават на растечката закана од Русија.
Интеграцијата на нордиските воздухопловни сили ќе создаде регионална флота од околу 250 ловци, еднаква на воената сила на Британија, со што ќе создаде вистински ефект на одвраќање на потенцијални напади.
Шведските вооружени сили би можеле да се приклучат на НАТО и пред крајот на тековните вежби.
„Имам шише шампањ подготвено да пукне штом ќе биде одобрено членството“, изјави командантот на норвешките воздухопловни сили Ролф Фоланд.
Унгарскиот парламент минатата недела го одобри приемот на Шведска во НАТО, отстранувајќи ја последната пречка во историскиот чекор на оваа нордиска земја по децении неутралност. Формалното пристапување завршува со поднесување на документите за пристапување во Вашингтон.
Финска стана членка на НАТО минатата година, но Шведска беше на листата на чекање бидејќи Турција и Унгарија, земји кои одржуваат подобри односи со Русија од другите членки на НАТО предводени од САД, имаа приговори.
Пристапувањето на Шведска, која не е во војна од 1814 година, како и на Финска, е најзначајното проширување на НАТО од неговото зближување со Источна Европа во 1990-тите.
