„Владата на Република Северна Македонија сè уште не ја напуштила изборната реторика. Потребно е да се вратиме во реалноста, Нашите односи ќе зависат од склучените договори“, изјави Радев.
Тој потенцира дека ангажманот на раководството на Македонија во врска со Коридорот 8 ќе биде јасен индикатор за вистинските европски амбиции и за поголема поврзаност во регионот.
„Очекувам дека изразената желба за дијалог и разбирање од страна на претседателката Сиљановска Давкова ќе остане како доследна политика на владата на Северна Македонија. Ние строго ќе го следиме протоколот. Време е и за мојата официјална посета на Република Северна Македонија“, посочи Радев.
На прашање дали веќе има таква покана, Радев одговори дека во врска со ова прашање ќе се разговара со претседателката на Македонија.
Инаку, претседателката на Македонија, Гордана Сиљановска Давкова вечерва во софиската Национална опера и балет ќе ја гледа операта „Набуко“ во изведба на македонската Национална опера и балет, а на овој настан е најавено да присуствува и бугарскиот претстедател Румен Радев.
„Ова гостување е дел од договорот за соработка потпишан во ноември 2023 година меѓу националните опери на двете држави, а следува по настапот на софиската Опера и балет на годинашните ‘Мајски оперски вечери’ со Вагнеровата опера ‘Валкира’“, соопштија од македонското Министерство за култура и туризам.
Во Софија се и министерот за надворешни работи и надворешна трговија, Тимчо Муцунски и министерот за култура и туризам, Зоран Љутков.
