„За жал, двојните стандарди, навиката да се држат предавања на други земји и политичкото лицемерие станаа еден вид модус операнди за политичарите, невладините организации под контрола на државата и лажните медиуми во некои западни земји“, рече претседателот на Азербејџан.
Воведните говори на годишните конференции за климата ретко содржат вака отворени политички напади и отворена одбрана на фосилните горива, особено од страна на земјата домаќин. Алиев нагласи дека нафтата и гасот се „Божји дар“, како и секој друг природен ресурс.
„Не треба да се обвинуваат државите што ги имаат и не треба да се обвинуваат дека ги ставаат овие ресурси на пазарот затоа што му требаат на пазарот. На луѓето им требаат“, истакна тој. Ова е втора година по ред како земја зависна од фосилните горива е домаќин на КОП. Минатата година конференцијата се одржа во Обединетите Арапски Емирати.
Алиев особено се фокусираше на европските земји кои подготвено потпишаа договори за проширување на купувањето на азербејџанскиот гас по почетокот на руската сеопфатна инвазија на Украина. „Тоа не беше наша идеја. Тоа беше предлог на Европската комисија“, посочи тој и ја опиша својата средба со претседателката на Европската комисија Урсула фон дер Лајен во јули 2022 година.
„Им требаше нашиот гас поради променетата геополитичка ситуација и побараа од нас да им помогнеме“, додаде тој.
Портпаролот на Европската комисија не го коментираше говорот на претседателот на Азербејџан. Европската унија се залага за зајакнување на минатогодишниот договор за постепено укинување на фосилните горива.
Економијата на Азербејџан во голема мера се потпира на производството на нафта и гас. Во 2022 година, наведеното производство сочинуваше речиси половина од БДП на земјата и 92,5 отсто од приходите од извозот, според американската Администрација за меѓународна трговија. „Како домаќин на КОП29, секако, ќе бидеме силен поборник за зелената транзиција. Но, во исто време мора да бидеме и реални“, рече Алиев.
Тој остро ги критикуваше американските медиуми бидејќи Азербејџан го нарекуваат „петродржава“, додека нивната земја е најголемиот производител на нафта и гас на Земјата.
Заврши со напад на граѓанските групи кои повикаа на бојкот на конференцијата поради репресивната влада на Азербејџан.
„Имам лоши вести за нив. Имаме 72.000 пријавени учесници од 196 земји. Меѓу нив 80 претседатели, потпретседатели и премиери. Значи, светот се собра во Баку и му велиме на светот: добредојде во Азербејџан“, заклучи тој.
