Орбан, сојузник на американскиот претседател Доналд Трамп, кој исто така негува врски со Москва, изјави за државното радио дека неговата влада во Унгарија ќе започне „јавна консултација“ за пристапувањето на Украина во Европската унија во наредните недели.
Унгарскиот премиер, кој е на власт од 2010 година, ја започнува оваа државна политичка кампања додека пред него се избори во 2026 година, а економијата штотуку излегува од инфлациска криза. Покрај тоа, тој се соочува со растечка нова опозициска партија која претставува најголем предизвик за неговото владеење досега. Европските лидери вчера ги поддржаа плановите за поголеми одбранбени трошоци и да продолжат да стојат со Украина во светот потресен од пресвртот на американската политика на Доналд Трамп.
Одбранбениот самит на Европската унија во Брисел се одржа среде стравувањата дека Русија, охрабрена од војната во Украина, би можела следно да нападне држава на ЕУ и дека Европа повеќе не може да се потпира на САД да ѝ помогне.
Но, Орбан, кој од почетокот на војната одбива да испрати оружје во Украина и одржува блиски односи со Москва, рече дека наместо продолжување на војната, Европа треба да ги поддржи мировните преговори на Трамп. Тој рече дека начинот на кој ЕУ сега сака да ја поддржи Украина, додека истовремено ги зголемува европските трошоци за одбрана, ќе ја „уништи Европа“.
„Ако САД сега се откажат (од финансирањето на војната)… како другите 26 земји-членки ќе имаат шанса да ја завршат оваа војна?“, рече Орбан за државното радио. „Денес се чини дека ставив вето. Но, за неколку недели ќе се вратат и ќе се покаже дека нема пари за овие цели“. Тој додаде дека начинот на кој ЕУ се обидува да ја поддржи Украина, додека истовремено ги зголемува сопствените воени трошоци, е „рецепт за уништување на Европа“.
Откако Доналд Трамп повторно стана претседател на САД, Орбан ги поддржува неговите ставови за војната во Украина, како и критиките дека Европа мора да преземе поголема одговорност за својата безбедност. Така, тој застана во одбрана на Трамп по средбата меѓу Трамп и Зеленски во Белата куќа, која заврши со расправија и заминување на Зеленски. „Претседателот Доналд Трамп го прави токму она што го вети за време на кампањата, прави сè што може да донесе мир“, рече Орбан во интервјуто.
„Тој рече дека ќе стори сè што е во негова моќ да донесе мир и тоа е она што го прави цело време. Во исто време, украинскиот претседател не сака мир, или барем не мир под условите што ги нудат Американците“, вели Орбан. „Но, Украина е целосно уништена, безброј луѓе загинаа, со огромни разурнувања и милиони раселени. Украина е на апарати“, рече Орбан. „Украина не може да опстане без финансиска помош од Америка и ЕУ и во такви околности Зеленски отиде да разговара со Трамп, кој сака мир“, заклучи унгарскиот премиер.
Трамп тврди дека Европа мора да преземе поголема одговорност за својата безбедност. Вчера тој изрази сомнеж во својата подготвеност да ги брани сојузниците на Вашингтон во НАТО, велејќи дека нема да го стори тоа доколку тие не платат доволно за сопствената одбрана. Неговата одлука да се префрли од цврста американска поддршка за Украина на попомирувачки став кон Москва длабоко ги вознемири Европејците кои ја гледаат Русија како најголема закана.
