Од прилепскиот кризен штаб веруваат дека е надмината опасноста пожарот да навлезе во селото Крушевица и кај манастирот „Свети Никола“ во Прилепец, но продолжува одбраната околу „Свети Димитрија“ во Селце и во Дрен – Смолани.
Ирена Стерјоска Локвенец, началничка на прилепскиот кризен штаб, информира дека одбраната од пожарот најмногу е концентрирана околу Крушевица, кон селото Дуже, над селото Прилепец, а кај селото Селце го чуваат манастирот „Свети Димитрија“.
„Тимовите работат интензивно кај Дрен и Смолани за пожарот да не се прошири во кавадаречкиот регион, а на располагање во вкупните сили денеска се 100 припадници на армијата, 30 од специјалната единица на полицијата, 30 луѓе од ЈП Национални шуми , пожарникари од повеќе градови и секако, месното население. Голема благодарност до сите кои вчера излегоа во голем број и успеавме да ги зачуваме објектите и да ги локализираме жариштата што беа активни. Во овој момент, потенцирам, нема опасност за верските објекти и нема простор за загриженост“, подвлече таа.
