„Разговаравме најпрво околу нужноста од што побрз старт на автоматизираниот систем за надзор ‘сејф сити’ по завршување со правните, односно нормативните измени, иако технички тој е веќе подготвен да се пушти во употреба. Меѓутоа примарно е да се заврши регулативниот дел околу законските прописи. Воедно беше констатирано дека е потребно вклучување на општинските служби, на општествено одговорните компании и на граѓанските здруженија кои што заедно со надлежните полициски организациони единици ќе работат на заеднички проекти насочени на подигнување на свеста на луѓето при учество во сообраќајот“, потенцираше директорот Јанев.
Беше донесена одлука преку кампањи, летоци, билборди и друг промотивен материјал да се засили превентивното работење, почнувајќи од децата па сè до сите учесници во сообраќајот, дури и од граничните премини при влез и излез од државата.
Покрај ова беше потврдена и потребата за модернизирање и надградување на низа процедурални, технички и подзаконски механизми во секојдневното полициско постапување и во работењето на логистичките служби. Меѓу другото, беше заклучено да се продолжи со натамошна мобилизација на сите полициски служби и решеноста драстично да се променат актуелните сообраќајни стандарди како во поглед на безбедноста во сообраќајот така и во поглед на почитувањето на сообраќајните прописи.
Воедно, во МВР се одржа состанок посветен на анализа на неодамна одржаната симулациска вежба – „Сообраќајна незгода помеѓу ПМВ-комби кое превезува мигранти и патнички автобус во која има поголем број на повредени лица и жртви“, на која присуствуваа претставници од повеќе организациски едници на МВР, Клиничкиот центар „Мајка Тереза“, Бригадата за противпожарна заштита при град Скопје, Центар за управување со кризи, претставници од Алфа ТВ и Општина Илинден, коишто исто така земаа учество во вежбата.
Директорот Јанев оцени дека резултатите од вежбата се задоволителни, оправдувајќи ја нејзината цел – да се прикажат постојните капацитети и подготвеност на припадниците на министерството, но и на другите надлежни институции во таквите сложени ситуации, и секако да се има јасен увид во ефективноста на заедничкиот и координиран пристап во справување при кризни состојби.
„Вежбата, дополнително беше извонредна можност за детектирање на сите можни слаби точки во синџирот на координирано дејствување, а се во насока на изнаоѓање нови можности, нови идеи за унапредување на меѓуресорската и меѓуинституционалната соработка на сите релевантни чинители во кризни ситуации“, потенцираше директорот Јанев.
Инаку на состанокот, еден од заклучоците беше дека е неопходна изработка на стандардни оперативни процедури (СОП) и протокол за постапување во вакви и слични ситуации, кои ќе биде достапен на ниво на цела држава за надлежните институции, кои би требало да имаат свои командни центри.
