Министерот за одбрана Владимир Падрино Лопез изјави дека речиси 200.000 припадници на вооружените сили се мобилизирани низ земјата во вежба што ја опиша како контрамерка против „заканите“ од САД.
„Речиси 200.000 војници се распоредени низ земјата за оваа вежба“, изјави Падрино Лопез за државната телевизија, додавајќи дека операцијата се спроведува заедно со редовните активности на вооружените сили и дека тие се подготвени за заканата што доаѓа од САД.
Овој потег беше проследен со законска акција. Националното собрание на Венецуела денес донесе закон со кој се зајакнува одбранбената стратегија на земјата против зголемувањето на военото присуство на САД.
Претседателот на Националното собрание, Хорхе Родригез, изјави дека законот воспоставува нов начин на справување со распоредувањето, извршувањето на наредбите, движењето на трупите и, пред сè, односот меѓу народот и вооружените сили.
Распоредувањето на венецуелската војска се совпадна со пристигнувањето на еден од најмоќните воени бродови во светот, УСС Џералд Р. Форд, во регионот, што предизвика загриженост за можна воена ескалација. Американската морнарица го потврди влегувањето на носачот на авиони во зоната на одговорност на Јужната команда на САД, која ги опфаќа Латинска Америка и Карибите.
САД велат дека најголемото воено распоредување во Карибите во последните децении има за цел борба против трговијата со дрога. Мисијата вклучува најмалку 19 напади врз бродови во меѓународните води, во кои, според извештаите, загинале најмалку 75 лица.
Венецуелскиот претседател Николас Мадуро ги отфрли обвинувањата за трговија со дрога, велејќи дека САД водат војна против неговата земја за да го соборат од власт.
