Во своето обраќање, Хоџа истакна дека водата денес не претставува само природен ресурс, туку прашање поврзано со безбедноста, економскиот развој, јавното здравје и квалитетот на животот. Тој нагласи дека новите европски политики ја позиционираат водата како стратешки ресурс и клучен фактор во процесот на климатска адаптација и одржлив развој.
„За нас ова е и обврска и можност – да го забрзаме усогласувањето со европските стандарди и да ги унапредиме реформите за поефикасно и поодржливо управување со водните ресурси“, истакна Хоџа.
Тој посочи дека климатските промени веќе имаат директно влијание врз водните ресурси преку суши и поплави, кои создаваат притисок врз земјоделството, екосистемите и целокупното управување со водите.
Во тој контекст, министерот го нагласи значењето на интегрираниот пристап кој ги поврзува политиките за животна средина, земјоделство, енергетика и просторно планирање.
Хоџа посебно ја истакна и потребата од дигитализација на управувањето со водниот сектор во институциите, како и инвестиции во природно-базирани решенија, кои, како што рече, се клучни за долгорочна климатска отпорност.
