Здружението Спас за Маврово во април годинава од Државниот инспекторат за градежништво и урбанизам побара инспекциски надзор на постапката за донесување на урбанистичкиот проект Блок 24 ГП 24.39 на КП 2048/2 во Маврово. Се работи за хотел во изградба, непосредно под хотелот Бистра. За новата градба од Спас за Маврово сметаат дека ја нарушува постоечката статика на куќата на соседот Чедомир Дамјановски.
Во известувањето на инспекторатот од 12 мај се вели дека постапката е водена според Законот за урбанистичко планирање, односно дека биле почитувани правилата за дозволено растојание од 1,20 метри и помошни отвори за вентилација и дневно светло со парапет од најмалку 1,60 метри.
„Притоа од наша страна е нотирано дека странката Чедомир Дамјановски како сопственик на дел од КП 2048/1 и КП 2048/3 со постојните градби е приближен до градежната парцела на растојание помеѓу 0 и 1,20 метри кое не е дозволено растојание за диспозиција на површина за градење согласно член 107 став 4 од Правилникот за урбанистичко планирање.
Заради спречување на нарушувањето на постоечката статика на куќата во сопственост на Чедомир Дамјановски ве упатуваме да се обратите до овластениот градежен инспектор на Општина Маврово Ростуше чија надлежност е да излезе на лице место и да ја утврди фактичката состојба и да преземе потребни мерки“, се вели во известувањето на ДИГУ.
Ова во превод значи дека всушност дедо му на Чедомир Дамјановски кој ја изградил вилата пред 45 години е виновен за тоа што напукнале ѕидовите затоа што бил преблиску до границата на парцелата на новиот сосед.
„Ова е навистина будалаштина. Па куќата е изграден пред 45 години. Ова беше државно земјиште. Кога лани почна копањето за новиот хотел алармирав до Општина Маврово Ростуше, издадоа едно времено решение за стопирање на градбата и толку. И сега инспекторатот пак ме праќа таму, а хотелот е веќе речиси готов“, вели Дамјановски.
Неофицијално, инвеститор на овој објект е судија на Апелацискиот суд од Гостивар.
За овој објект МКД.мк пишуваше уште лани во септември. Лани на 31 август фирмата и инвеститорот добиле решение за прекин на изградбата на хостел под хотелот Бистра во Маврово затоа што со почетокот на ископот ги довел во опасност околните објекти.
И покрај решението изградбата на објектот непречено продолжи.
Објектот е од втора категорија „за времено сместување – хостел, пансиони и згради апратмани со студија“. Градежниот инспектор тогаш увидел дека ископот се врши на површината на целата парцела, а јамата не била обезбедена поради стрмниот наклон на земјиштето. Рокот од 15 дена тогаш помина, не дојде до затрупување на градежната јама и враќање на земјиштето во првобитна состојба, како што пишуваше тогаш во решението. Изградбата продолжи, а годинава инспекторите утврдиле дека всушност вината е во семејството Дамјановски кои пред 45 години дошле до 1,20 метри од меѓата на новиот сосед.
А.Д.
