Одбраната на почетокот на судењето даде забелешки дека обвинителите, кои се 15 на број и кој работат на овој предмет, им доставиле докази кои се неуредни и во кои тие не может да се снајдат.
„Не можеме да се снајдеме за тоа кој доказ е доказ даден во електронска форма или на УСБ, сите докази се наопаку, а не може да се превртат. Доказите генерално се неуредни, а таа листа на докази треба да ни бидат водич за ова судење. Има многу грешки и не можеме да се снајдеме. Судот да го задолжи Обвинителството да даде докази кои се нумерирани и средени“, рече пред судот адвокатката Сузана Јошевска.
На ова обвинителот Борче Јанев одговори дека доказите ќе бидат средени и ќе ѝ бидат доставени на одбраната.
„Доказниот материјал не е нумериран, туку е даден редоследно. Сите докази кои се наведени како докази, се предадени на одбраната во текот на месец јуни. Точно е дека има повторување на некои докази, но во самите ПДФ фајлови се означени доказите кои се дадени и можат да се снајдат“, вели обвинителот Јанев.
Во пожарот во дискотеката „Пулс“ во март годинава во Кочани, загинаа 63 лица, меѓу кои и деца, а над 200 беа повредени.
Судењето денес треба да продолжи со произнесување на вина и воведни зборови на одбраната, откако на минатото рочиште Обвинителството во воведниот говор порача дека се бара одговорност по име и презиме за тоа кој дозволил, кој молчел и кој не ја спречил трагедијата во ноќниот клуб.
Обвинителот Борче Јанев на првото рочиште за трагичниот пожар истакна дека се бара одговорност по име и презиме, а општеството мора да се соочи со болната вистина и да извлече легитимни одговори за тоа кој дозволил, кој молчел и кој не спречил, бидејќи, како што рече, се бара правда не како утеха или одмазда, туку како последица на незаконитост.
„Не е важно само кој го запалил огнот, важно е кој имал кофа вода и не ја истурил“, рече Јанев, нагласувајќи дека катастрофата не е резултат само на пиротехниката, туку на години институционален молк, пропусти и недостиг од контрола кои го претвориле клубот во „смртоносна стапица“.
Трагедијата од 16 март 2025 година, според Обвинителството, е резултат на систематска негрижа и игнорирање на безбедносните закани: дискотеката функционирала без противпожарен систем, со затворени прозорци, лесно запаливи и токсични материјали и само еден излез за евакуација, додека во критичната вечер бил дозволен неконтролиран влез на над 600 гости, меѓу кои и деца по полноќ, без проверки за опасни средства.
Настапот на групата ДНК бил претходно договорен со употреба на пиротехника, а вградените материјали, особено сунѓерот на плафонот, при согорување ослободиле смртоносни гасови, што во услови на недоволни излези довело до загуба на млади животи и катастрофални последици.
И на денешното второ по ред рочиште во судница се присутни родителите и роднини на загинатите во трагедија. Судењето кое е во тек го води судијката Диана Груевска Илиевска.
К. Додевска
