Откако Вашингтон се најде на мета на критики на некои европски земји поради разговорот меѓу американскиот претседател Доналд Трамп и претседателот на Русија Владимир Путин оваа недела, Венс во интервју за Волстрит џурнал пред Безбедносната конференција во Минхен кажа дека САД имаат средства кои можат да ги употребат за да ја поттикнат Русија да постигне договор за завршување на војната.
„Постојат економски алати за притисок, и нормално, постојат и воени алати за притисок“ кои САД можат да ги искористат против Путин, кажа Венс.
На прашањето за воениот притисок, портпаролот на Кремљ Дмитриј Песков кажа дека Москва сака да дознае повеќе.
„Ова беше нов елемент во ставот на САД. Не слушнавме вакви формулации претходно, тие не беа кажани претходно“, им кажа Песков на новинарите.
„Така што, нормално, во текот на самите контакти за кои зборувавме, се надеваме дека ќе добиеме дополнителни појаснувања“.
Трамп вчера кажа дека претставници на САД и Русија ќе се сретнат денес во Минхен, и дека и Украина е повикана, меѓутоа Киев одговори дека не очекува разговори со Русија во германскиот град.
Песков, на прашањето за изјавата на Трамп за присуството на руски функционери во Минхен, кажа дека Кремљ нема ништо ново да каже за напорите за мир во Украина и дека ќе бидат потребни неколку дена за воспоставување дипломатски контакти со САД за Украина.
Од друга страна, Марија Захарова, портпаролката на руското министерство за надворешни работи кажа дека руски функционери нема да присуствуваат на Безбедносната конференција во Минхен бидејќи Русија не е поканета на тој настан кој, како што обвини, станал „деструктивен, проукраински собир“.
Меѓутоа, не е јасно дали руски функционери можеби сепак ќе отпатуваат во Минхен на состаноци надвор од конференциската локација со функционери на САД или други земји.
Киев и неговите европски сојузници се плашат дека може да бидат изоставени од преговорите, откако Трамп и Путин договорија средба за да разговараат за начините за завршување на тригодишната војна.
