Во своето воведно обраќање, за време на сослушувањето пред Комисијата за надворешни работи на ЕП, Калас рече дека проблемите на соседите на ЕУ денес, се проблеми на ЕУ утре.
„За повеќето наши соседи, Европската унија има силна моќ на привлечност, од Западен Балкан до Украина“, посочи Калас.
Таа нагласи дека проширувањето на ЕУ е геостратешка инвестиција која е во интерес на ЕУ.
„Тоа ја прави нашата Унија посилна. Ова ги прави новите членови на европското семејство постабилни и побезбедни. И тоа прави сите ние да напредуваме. Во следните пет години ни требаат јасни резултати овде. Ќе работам рака под рака со комесарката за проширување за да се постигне оваа цел“, рече Калас.
Таа додаде дека ќе соработува со комесарката за Медитеранот на пактот за тој регион.
„Во соработка со нашите партнери низ Медитеранот, градење на сеопфатни, заемно корисни и почитувани партнерства, ќе ја зајакнеме регионалната стабилност и економската интеграција“, рече Калас.
Таа нагласи дека слободата на движење во рамките на ЕУ е едно од нејзините најскапоцени добра.
„Мораме да ги заштитиме нашите надворешни граници за тоа да функционира. Не можеме да бидеме и надвор и внатре без граници“, рече Калас, додавајќи дека ќе работи со комесарката за миграција на изградба на „сеопфатни, приспособени, заемно корисни партнерства“.
Калас рече дека постојат два итни приоритети кои се многу блиски до ЕУ, а тоа се војната на Русија против Украина и актуелниот конфликт на Блискиот исток, а таа нагласи дека безбедноста на Украина е приоритет за ЕУ и дека, со оглед на тешката ситуација на бојното поле, ЕУ мора да работи секој ден на онолку „воена, финансиска и хуманитарна помош колку што е потребна“.
Кога станува збор за Блискиот Исток, таа ја истакна потребата од итен прекин на огнот и безусловно ослободување на сите заложници, повик до сите партнери на крајна воздржаност, фокус на хуманитарната поддршка и непоколеблива посветеност на решение за две држави со поддршка од ЕУ за палестинските власти и правото на Израел да постои.
Во исто време, таа ги обвини Русија, Кина, Северна Кореја и Иран дека сакаат да го променат меѓународниот поредок заснован на правила.
