Израел прими четири тела, соопшти кабинетот на премиерот Бенјамин Нетанјаху во раните утрински часови во четвртокот.
Хамас претходно ги идентификуваше телата на Цачи Идан, Иџак Елгарат, Охад Јахаломи и Шлом Манцур, сите киднапирани за време на нападот на 7 октомври 2023 година од нивните домови во заедниците во близина на Газа.
Се очекува израелските форензички тимови да го потврдат нивниот идентитет, соопшти израелското Министерство за здравство.
Прекинот на огнот стапи на сила на 19 јануари и во голема мера се одржа, и покрај бројните неуспеси. Но, неговата прва фаза треба да заврши оваа недела, а судбината на следната фаза, чија цел е да се стави крај на војната, останува нејасна. Хамас соопшти дека досега не добил никакви предлози.
По неколкудневната безизлезна ситуација, египетските посредници обезбедија предавање на телата на последните четворица заложници од првата фаза од договорот, за 620 Палестинци кои биле приведени од израелските сили во Газа или биле затворени во Израел.
Израел одби да ослободи затвореници во саботата, откако Хамас предаде шестмина заложници на организирана церемонија.
Хамас живите заложници и ковчезите со посмртните останки на заложниците ги изложи на сцена пред толпа во Газа пред да ги предаде, што предизвика остри критики, вклучително и од Обединетите нации.
Од друга страна, автобус со дел од ослободените палестински затвореници го напушти израелскиот затвор Офер на окупираниот Западен Брег и неколку минути подоцна пристигна во палестинскиот град Рамала, покажуваат снимките.
Првата фаза од прекинот на огнот вклучуваше размена на вкупно 33 израелски заложници за околу 2.000 палестински заробеници и затвореници, како и повлекување на израелските војници од некои позиции во Газа и прилив на помош.
Но, со оглед на тоа што 42-дневниот прекин на огнот истекува во сабота, останува нејасно дали ќе има продолжување што може да доведе до ослободување на повеќе од 59 преостанати заложници или можат да започнат преговорите за втората фаза од договорот.
