Вчера полицајци го привеле Ф.Ф.Ш.Ч.(42) од САД, затоа што во хотел на улицата „Јордан Мијалков” се однесувал недолично, а недолично и агресивно се однесувал и кон полицајците.
Потоа американскиот државјанин бил приведен во полициската станица Кисела Вода поради сторениот прекршок против јавниот ред и мир. Додека влегувал станицата, повторно почнал агресивно да се однесува и да удира со раце и нозе по инвентарот. Еден од полицајците го предупредил да престане со насилното однесување, осомничениот се свртел кон него и му задал повеќе удари со бокс по лицето, нанесувајќи му телесни повреди. Во тој момент уште двајца полицајци се обиделе да го совладаат, но осомничениот и нив почнал да ги удира со боксови, нанесувајќи им телесни повреди. По извесно време, полициските службеници успеале да го совладаат осомничениот.
Основното јавно обвинителство Скопје поведе постапка против 42-годишниот државјанин на САД. Против него ќе биде поднесена пријава за кривично дело – напад врз службено лице при вршење работи на безбедноста од член 383 став 2 во врска со став 1 од Кривичниот законик, соопштија од ОЈО Скопје.
