Опсерваторијата за човекови права соопшти дека 277 лица, вклучувајќи повеќе од 20 цивили, биле убиени од почетокот на офанзивата во средата.
Офанзивата е најголемата воена операција против сириската влада во последниве години и прв пат бунтовниците се борат против силите на претседателот Башар ал Асад во Алепо откако сириската армија со помош на Русија и Иран ги протера во голема офанзива во 2016 година.
Аеродромот во Алепо и сите патишта што водат до градот се затворени, изјавија воени извори за Ројтерс.
На видеото објавено на социјалните мрежи се гледаат бунтовнички борци внатре во градот. Би-би-си ја лоцираше снимката во западните предградија на Алепо. На видео снимките се прикажани вооружени мажи на околу седум километри од средновековната тврдина Алепо, која се наоѓа во строгиот центар на градот.
Во петокот, владините сили соопштија дека ги вратиле позициите во неколку градови во провинциите Алепо и Идлиб, по офанзивата што ја започна во средата исламистичката бунтовничка група Хајат Тахрир ал-Шам (ХТС).
Заменик-координаторот за хуманитарна помош на ОН за Сирија, Дејвид Карден, изјави дека е длабоко вознемирен од влијанието на ескалацијата на непријателствата врз цивилите.
Сириските и руските авиони извршија 23 воздушни напади во петокот во близина на Идлиб, при што загинаа четворица цивили, 19 беа повредени, според руските новински агенции, нејзината војска ги бомбардирала „екстремистичките сили“.
Портпаролот на Кремљ, Дмитриј Песков, изрази поддршка за „владата на Сирија брзо да го воспостави редот“ и рече дека суверенитетот на земјата е нападнат.
Голем број вооружени групи кои се спротивставуваат на владата на Асад – вклучувајќи ги и џихадистите – се борат против сириската влада.
Идлиб, последното преостанато упориште на опозициските сили, главно е контролирано од ХТС, исто така е домаќин на бунтовничките фракции поддржани од Турција.
Борбите во Идлиб во голема мера престанаа во 2020 година, кога Турција и Русија, клучниот сојузник на Сирија, посредуваа за прекин на огнот за да го спречат притисокот од владата да ја врати провинцијата.
Но, во средата, ХТС и нејзините сојузници соопштија дека ја започнале офанзивата за „да ја одвратат агресијата“, обвинувајќи ја владата и сојузничките милиции за ескалација на непријателствата.
Граѓанската војна во Сирија започна во март 2011 година, се проценува дека во бруталните борби загинале повеќе од половина милион луѓе, главно цивили, додека речиси половина од населението е раселено.
