Орбан во петокот се сретна со својот „добар пријател“ Трамп во американската сојузна држава Флорида.
Унгарскиот премиер е еден од ретките лидери во Европа кои му посакаа победа на републиканскиот кандидат на претстојните претседателски избори во ноември, каде што ќе се натпреварува со демократот Бајден.
Бајден на синоќешниот предизборен митинг на своите приврзаници им кажа дека неговиот противкандидат Трамп „се сретнал со Орбан од Унгарија, кој отворено кажа дека не мисли дека демократијата функционира и дека бара диктатура“.
„Гледам иднина во која ќе ја браниме демократијата, а не да ја правиме послаба“, рече Бајден, кој демократијата ја смета за еден од неговите аргументи во кампањата против Трамп.
Орбан синоќа на Фејсбук објави своја фотографија покрај поранешниот претседател со слоганот на Трамп „Направи ја Америка повторно голема“.
It was a pleasure to visit President @realDonaldTrump today. We need leaders in the world who are respected and can bring peace. He is one of them! Come back and bring us peace, Mr. President! pic.twitter.com/rbCYvygzNy
— Orbán Viktor (@PM_ViktorOrban) March 9, 2024
„Посетата беше фокусирана на градење на односите меѓу американските и унгарските конзервативци и на придобивките што би можеле да произлезат од изборот на Трамп во ноември“, соопшти придружбата на Орбан.
Бајден уште еднаш ги осуди изјавите на поранешниот американски претседател, кој, според него, го охрабрува рускиот претседател Владимир Путин да ги нападне земјите на НАТО.
Унгарија е единствената членка на Европската Унија која одржува блиски врски со Кремљ и покрај руската инвазија на Украина во февруари 2022 година.
Орбан одбива да испрати каква било воена поддршка за Украина и редовно повикува на прекин на огнот, убеден дека Киев не може да победи.
